2024 жылдың 15 ақпан күні Кеңес әскері шектеулі контингентінің ауған жерінен шығарылғанына 35 жыл толады.
Осы айтулы күн қарсаңында 12 ақпан күні мемлекеттік-құқықтық даярлық жүйесінде 62064 әскери бөлімінің жеке құрамы ауған соғысы ардагерлерімен кездесу өткізілді.
Кездесуге Алматы облыстық ауған соғысы ардагерлері ұйымының төрағасы, Қонаев қаласының "Құрметті азаматы" Қанат Молдабергенов және Қонаев қалалық ауған соғыс ардагерлері ұйымы төрағасының орынбасары, қалалық мешіт имамы, "Айбын" орденінің иегері, Қонаев қаласының "Құрметті азаматы" Алдажар Сейітұлы қатысты.
Кездесу ауған жерінде қаза тапқан боздақтарды бір минуттық үнсіздікпен еске алумен басталды. Жеке құрамға қонақтарды таныстырып өткеннен кейін, ауған соғысы жайында бейнеролик көрсетілді. Келесі кезекте ардагерлер сұрапыл соғыс барысында басынан кешкендері туралы отансүйгіштік рухта әңгімелеп, сарбаздардың сұрақтарына жауап берді.