"Таза Қазақстан": Қонаевта аптасына 600 тонна қоқыс шығарылады

Қонаевта республикалық "Таза Қазақстан" эконауқаны жалғасуда. Науқан аясында қаланы қоқыстан тазарту жұмыстары қарқынды жүруде.

ТҮКШ бөлімінің мәліметінше, аптасына қаладан 600 тонна қатты қалдықтар шығарылады.

"Шомылу маусымының басталуына байланысты қалада туристер ағыны өте көп. Барлық күшті жағажайларды тазалауға жұмсап жатырмыз.

Мысалы, қалалық №7 жағажайдың өзінде 59 қоқыс жәшігі орнатылған. Күніне 90 тонна қалдық шығарылады. Ал қаланың ішінен күнделікті 10-12 тонна қоқыс жиналады", – деді ТҮКШ бөлімі басшысының орынбасары Асхат Жексенбек.

Сондай-ақ парктер мен скверлер де үнемі тазалануда. Өткен аптада бір күннің ішінде 12 шақырым арық тазартылды. Қосымша ағаштарды санитарлы кесу жұмыстары жүруде. Тазалыққа күнделікті 120 адам, 14 техника жұмылдырылып жатыр.

Қонаев қаласы әкімдігінің баспасөз қызметі